Sunday, December 9, 2007

انا ستوتة انا بيوتة

مساء الخير
وحشتونى موت عارفة اتاخرت عليكوا بس انا كدة دايما فى اخر شهر قبل الامتحانات بمتنع عن النت تماما
بس اعمل اية بقى وحشتونى قلت اجى ارغى معاكوا شوية

وانا بقلب فى المدونات الى زارتنى الفترة الى فاتت لقيت مدونة لزيزة جدا اسمها اجدع بنوتة
وكاتبة بوست عن الاعلانات المدهششششة الى بنشوفها اليومين دول
انا كنت فعلا ناوية اتكلم عن الحوار دة بس هى سبقتنى
فعلا الاعلانات بقت مستفزة جدا وتحس ان هما بيقلولك انت حمار بالعقل
قال ماما السوبر قال
بس انا بقى على عكس اجدع بنوتة
مستفزنيش ماما السوبر الى هتخلى الشمس تنور
ولبتون الى بشفتة منو هيحلوا مشكلة الشرق الاوسط ويقضوا على البطالة ويجوزوا الشباب
ولا بانتين ضد القشرة الى هيخلى كل المزز يشتغلو فى التلفزيون
ولا فير اند لفلى الى هيخليلك مستقبلك منور زى وشك بالظبط
على قد ما استفزنى الاعلانات المصرية الهاااااايلة اللى انتاجها لا يتعدى الجنية ونص.
تقريبا بيعملوا الاعلانات بنفس ميزانية العيش المدعم
يعنى المفروض ان انا لما الاقى واحدة طالعة تقول انا ستوتة انا بيوتة انا ست البيت وصغنطوطة اطلع اجرى واشترى مكنسة عشان ابقى ستوتة انا كمان اشمعنى هى
ولا الخافض الى بيوفر فى الغسلة 10 مرات
ياخى انشاللة عنك ما وفرت. ملعون ابو القرش الى ما يدلع صاحبة
دة منظر اعلان يرضى ربنا
دة انا كرهت الغسيل بسببة
واللة العظيم انضف اعلانات فى التلفزيون هى اعلانات موبينيل و ميلودى يتحدى الملل
نفسى الواد التخين دة يمسك بتوع الاعلانات دول يفرتكهم واحد واحد مزمزة كدة
ولا انتوا رايكوا اي
ة

Monday, October 22, 2007

نصيحة للبنات

معلش اتاخرت عليكوا انا عارفة انى بستهبل الصراحة بس معلش بقى خليها عليكوا المرة دى
يلا نبدا
المرة دى بقى الكلام للبنات المساكين عشان ياخدوا بالهم وعشان محدش يقول عليا متهضة البنات ومتحيزة للرجالة
بصى يا بنتى منك ليها اقعدى كدة وربعى وركزى معايا
المفروض تكونى عرفتى ان كل الولاد بقوا موسوسين وعندهم هسس فى دماغهم ان كل البنات ........ .
يعنى بلاش شغل الهطل الى احنا كنا فية دة
مش كل ما يقلك يلا نخرج تقليلوا يلا عشان اول حاجة هتيجى فى دماغة انك صايعة و24 ساعة فى الشارع
وانتى يا ولداة هتكونى حابسة نفسك فى البيت عشان لما تيجى تخرجى معاة امك ترضى تنزلك
بس هو بما انة عرف 66 واحدة قبلك عمرة ما هيفكر فى كدة
واوعى عمرك يقلك تعالى اوصلك بالعربية وتروحى
ولو قلتيلوا لا هيقلك اية يا بنتى يعنى تركبى تاكس وانا موجود اية الهبل دة وانا الى بقول عليكى دماغك جامدة
وانتى طبعا زى الهطلة تكسفى لما يقولك كدة وتحاولى تسبيتيلوا انك مش متخلفة ولا حاجة وانك فعلا دماغك جامدة وهو كل الحكاية بيختبرك او عايز يمسك ايدك
ومتحاوليش تشتغلى نفسك وتفهمينى انك هتنجحى فى الاختبار لانة هيمسك ايدك هيمسك ايدك ومافيش مانع ابدا من انة يبوسك كمان
وورينى بقى يا جامدة هتقولى لا ازاى ولا هتقفشى ازاى وانتى مع واحد بتحبية وبتموتى فية وفى العربية بتاعتة وهو بيبصلك وبيضحكلك بعنية العسلى وبيبوس ايديكى
ابقـــــــــــــى قابـــــــــــــــليـــــــــنى
والشيطاااااااااااااان ثالثكمااااااااااااااا :]
وبعدين بلاش تليفونات طول اليل دى كتر السلام يقل المعرفة
انا عارفة ان الحوار دة بالذات صعب وكمان انتى بتكونى عايزة تعرفى كل تحركاتة طول اليوم بس الولاد بيزهقوا بسرعة فسيبى شوية لبعد الجواز مهو كدة كدة هيزهق
اصل لو كل ما يعوز يكلمك هيلاقيكى هيزهق وانتى عارفة الممنوع مرغوب
والموضوع دة عايز زكاء شوية يعنى زى ما بيقولوا التقل صنعة
وبلاش وحياة ابوكى القفش الى عالفاضية والمليانة دة اصل يعنى كتر الخناق مش هو دة الى هيسبت ان سيادتك محترمة
خلى زعلك عزيز.
وخلى دايما فى بينكم حوار
حتى لو طلب منك حاجة انى مش عايزة تعمليها لازم تفهمية وجهة نظرك الاول بالحوار سواء كان طلب عادى او كان بيختبرك لازم تفهمية انتى لية مش عايزة تسمعى الكلام بحوار هادى عشان دة الى هيبين شخصية كل واحد للتانى
ومش معنى ان الولاد موسوسين وان البنات الى بيستهبلوا زادوا حبتين فى السوق وناقص يتوزعوا عالبطايق يبقى احنا نمثل بقى وكل واحدة تعيش دور الانسة وتعمل محترمة بزيادة
لا كل واحد عارف نفسة هو على اية وانتى مش مسؤولة عن مشاكلة النفسية ولا مطلوب منك تثبتى لحد اى حاجة
انتى بس بتحاولى تاخدى بالك وتستوعبى وتحتوى مشاكلة دى بطريقة زكية
انما فى جميع الاحوال ولد بنت لازم كل واحد يكون على طبيعتة لانك لو قضتيها تمثيل انتى هتكونى اول واحدة بتتعسفى بعد الجواز وساعتها هتكون صدمة عمرك
وياريت لما نيجى نحب نحب بقلبنا وبعقلنا مش بقلبنا بس ولا عقلنا بس

Wednesday, October 10, 2007

فاقدين الامل ومرضى الشك

النهاردة هكلمكوا فى موضوع مطروح على الساحات بقوة اليومين دول
وطبعا انا عرفت الحوار دة بحكم ان انا عايشة فى مجتمع ذكورى بحت
يعنى اخواتى ولاد وعيلتى كلها ولاد وانا بلا فخر البنت الوحيدة فى وسط عيلة مكونة من 21 ولد تقريبا واغلب اصدقائى ولاد
.. متفهمونيش غلط صداقة بحكم الاجتماعيات يعنى جيران واصحاب الاهل والكلام الى انتوا عارفينوا دة وبعتبرهم كلهم اخواتى يعنى
وبصراحة الولاد اجدع من البنات بكتير واريح للدماغ ولا فلانة قالت ولا علانة عادت و انا مليش فى حوارات الحريم دى اصلا.
يعنى تقدروا تقولوا انى ليا بتاع 30 اخ واختين

وبما ان كل اخواتى لما بتقابلهم مشكلة بيجوا يحكولى صغير فيهم او كبير فلقيت ان فى مشكلة مشتركة بينهم كلهم وبعد مباحثات اكتشفت ان كل الولاد كدة بلا استثناء
المشكلة ان هما من كتر ما شافوا حاجات مبقوش يثقوا فى البنات خالص
لدرجة ان ابن عمى مرة قالى" انا مش مصدق اصلا ان عندك 21 سنة وعمرك ما اتبستى" ...!

طبعا السؤال صدمنى وحاولت اتمالك اعصابى عشان ماردش علية رد فج او غبى وكمان عشان افهم وجهة نظرة فى السؤال البجح دة.
اصل من امتى يعنى والبوس والاحضان دى حاجة عادية كدة زى ما يكون بيسالنى انتى عمرك ما كلمتى ولاد ولا عمرك وقفتى مع زمايلك فى الجامعة
يمكن جزء من صدمتى انة كان اصغر منى وانا فى سنة بصراحة مكنتش لسة اكتشفت اية البوس دة اساسا
المهم حاولت انى امتص حدة الموقف واقلبها هزار
وقلتلة "يا نهار اسود اتباس ازاى يعنى زى براد بيت وانجلينا جولى كدة "
مات من الضحك زى ما يكون انا من العصر الحجرى. وفكرنى بتيتة لما كانت بتقول على الانترنت الالترليت
قالى" يا بنتى هو انا بقلك حاجة كبيرة دى بوسة "
طبعا مسئلتش هو فية اية اكبر من كدة عشان مش عايزة اعرف مدى التطور الى احنا انجزناة
واكتفيت بانى اسالة " يعنى انت لما تيجى تتجوز هترضى تتجوز واحدة انت عارف انها باست واحد قبلك"
قالى" ياريت الاقى واحدة اتباست بس اصلا"
طبعا سيبتة وقمت لانى من الصدمة بجد ما كنتش قادرة اكمل الحوار
وبعدها بيومين قام بينى وبين اخويا الكبير حوار مشابة
(مش كبير اوى يعنى اكبر منى بسنة واحدة بس)
وحسيت فى نبرة كلامة على عكس كلام ابن عمى فاقد الامل لقيت ان دة فاقد الثقة تماما
قلتلة " مهو كدة انت لو اتجوزت واحدة وحسيت انها ممكن تكون حبت قبلك مش هتقدر تثق فيها"
قالى" مين قالك انى هتجوز اصلا...هاتيلى بنت واحدة عدلة وانا اتجوزها"
طبعا الى اثار كل الحوارات دى ان لينا صديق مقرب جدا للعائلة فرحة بعد العيد والمشكلة ان الى هو ناوى يتجوزها .......... مش مناسبة اوى يعنى
وبعد محادثات طويلة بيننا وبينة اكتشفت ان هو الاخر فاقد الامل لدرجة مخيفة وكانت اخر كلمة قالها
"ما كل البنات كدة"

لا يا جماعة
واللة العظيم مش كل البنات كدة

وللولاد الى فقدوا الامل والى فاكرين ان خلاص امة هى اخر النساء المحترمين
واللة العظيم المحترمين كتير وعلى قفا من يشيل ومش لاقين حد يعبرهم بس الى يعرف يحكم صح وللاسف السيئة بتعم والبنات الى مش كويسين بيعرفوا يوقعوكوا صح

وللولاد الى فاقدين الثقة فى البنات مش معنى ان هى مشاعرها رقيقة واحترمتك وحبتك ووثقت فيك يبقى هى مش محترمة ولا بت من اياهم مش عشان سابتك تمسك ايدها تبقى عملت وسوت وهببت قبلك.
ما قلتش ان هى كدة عمايلها صح لكن بقلك احكم بالجوهر مش بالمظهر

وانا من منبرى هذا ... أ احم.. قصدى يعنى بما انى بنت فاكيد عندى خبرة الى حد ما فى حركات الحريم
وهقلك على كام حاجة يالى فى بالى .. عارف نفسك طبعا..

البنات نوعين محترمة ومش محترمة.........!

البنت الى مش محترمة نوعين:


النوع الاول: مش محترمة وعارفة انها ش....... مش محترمة وراضية وعاجبها ومقتنعة بنفسها انها مش محترمة ومعندهاش اى مانع ان الناس تقول عليها مش محترمة
وطبعا افتكر انى مش محتاجة اقولك انك تبعد عن النوع دة خاااالص الا اذا كنت انت ابيح بقى انت حر فى نفسك


النوع التانى: تبقى مش محترمة بس من تحت لتحت
وتيجى تكلمها تقلك لا انا مبكلمش ولاد انا مبسلمش على حد فى الشارع
انا عمرى ما كلمت ولاد اصلا
بلاش ترنلى بعد الساعة 8 احسن مامى بتقفش
واوعى تكلمنى دادى جى ورايا
وطبعا انت زى الجردل تلبس فى الحيط وتقول بس هى دى محترمة ومؤدبة وبنت ناس ومامى ودادى
وهى تلاقيها اسمها سالى اساسا وابوها واقف فى الخلفية يقول بـــــــــــــــــتــــــــــــــ يا ساااااااااااااالى كل دة ........

وانت طبعا بما انك فاقد للامل فبتكون معذور اول ما تلاقى واحدة زى دى بتتشعبط فيها زى الغريق الى بيتشعبط فى قشاية
ودى مش هقلك فيها غير حاجة واحدة مشى وراها واحد صاحبك حلو حبتين وبعربية جامدة وشوف هى هتعمل اية ان مكانتش تقلبك بعدها بيومين وتعلقة مبقاش انا.


نيجى بقى للغلابة المحترمين الى متاخدين فى الرجلين فهما برضة نوعين :

النوع الاول:

الولد: بحبك

البنت :.... بتحبنى ... ازاى يعنى انت اهبل ولا اية

الولد: يحاول يقف جمبها داخل الحرم الجاااامعى

البنت :اية دة اية دة اية دة ...... انت هتهترج معايا

الولد :اية يا بنتى ما بترديش على موبايلك لية كلمتك امبارح 60 مرة

البنت :انت ازاى تكلمنى عالموبايل اصلا انت مش عارف انى فى البيت

الولد :فى النادى يسلم عليها

البنت :اية دة يعنى ان شاء اللة لما نبقى نتخطب يا بابا تبقى تمسك ايدى ال يسلم عليا ال
وتبصلة بصة ذكاء ال يعنى البت بقى جابتة كدة لا صايعة يا بة
وطبعا انت ترضى بالهم دة كلة لانك عايز واحدة محترمة وعندك وسواس ان كل البنات زى الزفت وتروح زى البرنس تطلب ايدها وبعد الجواز تلاقى الحقيقة المرة انك انت للاسف اتجوزت لوح ثلج يعنى لو كنت اتجوزت صول دورية كان اشيكلك


النوع التانى من البنات المحترمين:
تلاقيها كدة قطة عسولة كتكوتة بتحبك وبتموت فيك ولو زعلت منها فى مرة تموت نفسها عشانك وكل حاجة نعم وحاضر وطيب
تقلها بحبك تقلك وانا كمان
تيجى تمسك ايدها يادوب وشها يحمر وتدارى عشان متحسسكش انها مكسوفة
وطبعا بما انك فاقد للثقة ومريض بالشك اول متسيبك تمسك ايدها هتقول بس هو انتى منهم لا يا عم دة انا مسكت ايدها

طب المطلوب منها اية تقوم تلطشك بالقلم عشان تبقى محترمة هى مش كدة
طبعها رقيق استحالة هتعمل كدة .ولو عملت كدة تبقى مبتحبكش

وللاسف فى الغالب النوعية الهطلة دى بتكون انت اول واحد فى حياتها ولو مكنتش فبيكون قلبها دهب وانت زى العبيط بتضيعها من ايديك بالشك المريض الى عندك

ولان اغلب الولاد تفكيرهم عمرة ماكان ابعد من مظهر ولبس وشوية حركات فبتحكم عليها من برة بس من غير ما تحكم على شخصيتها
وزى ما انتوا شايفين لو بصينا للمظاهر هتلاقى انة سهل اوى النوع الاول من البنات المحترمين يتلخبط مع النوع التانى من البنات الى مش محترمين
والنوع التانى من البنات المحترمين ممكن انت تعمل فتك وتفتكرها من النوع الاول من البنات الى مش محترمين

هتسالنى وتقولى طب وانا اعرف منين

هقلك يا مسكين:

رقم واحد
لازم تتخلص من كل الكلاكيع والعقد الى عندك من فقدان الامل والشك الى انت فية
رقم تو
وانت داخل علاقة جديدة تدخل فاتح قلبك وعقلك الاتنين واحد بس ما ينفعش
رقم تلاتة بقى
نفض لحركات الحريم القارعة دى وركز وحلل البت نفسيا وسيكولوجيا

مش معنى انهى قالتلك انت اهبل اوعى كدة تبقى محترمة
ومش معنى انهى سابتك تمسك ايديها وقالتلك بحبك تبقى سافلة

ولما تختار اختار الشخصية الى تناسبك والى تحافظ عليك وعلى بيتك وعلى كرامتك وعلى رجولتك
يعنى من الاخر اول صفة تدور عليها الاخلاص
البنت المخلصة مش الى بتحبك وهى حاطة 4 استبن لو انت ما روحتش تخطبها فى غيرك يعنى . اشطة
ولو لقيت بجد البنت الى بتحبك ومخلصة ليك ومحافظة عليك يبقى انت كدة كسبت حتى لو مسكت ايديها



معلش طولت عليكوا
انا كنت كاتبة البوست دة اصلا فى 7 صفح
بس حاولت اختصر على قد ما قدرت
وللحديث بقية قريبا ان شاء اللة
سوووووووون

Saturday, September 29, 2007

انت التلت وانا التلتين


أحمد كان فى يوم معاه سمكة
جه مصطفى و أخد منه السمكة بتاعته
أحمد و مصطفى قعدوا يتخنقوا و يبهدلوا فى بعض
جه يوسف قلهم لا لا لا يا جماعة فين قيم الحوار و التسامح أنا عندى فكرة : أحمد ياخد تلت السمكة
وانا تلت و مصطفى تلت و بكده كلنا هنبقى سعداء و مبسوطين

خلصت القصه

وأحمد الاهبل بقى مبسوط بتلت السمكة اللى كلها كانت بتاعته
حسبنا الله و نعم الوكيل
القصة ملطوشة بس بجد كان لازم احكيهالكم

رمضان السنادى

بقالى فترة والحوار دة شاغلنى جدا وخايفة منة قوى وتقدروا تقولوا ان دة الهاجس الجديد المسيطر عليا اليومين دول
ربنا يعديها على خير بقى .
بس قبل ما اقولوكوا الهاجس دة اية لازم اسئلكوا الاول على حاجة غريبة انا ملاحظاها مش عارفة انا بس الى ملاحظاها ولا اية
يمكن انا ملاحظة غلط ولا حاجة
يمكن الى خلانى اخد بالى من الحكاية دى موسم رمضان وكدة يمكن انا عشان عندى فكرة من وانا صغيرة ان رمضان دة عشان نعبد ربنا وكانت دايما ماما فى الشهر دة تحكيلنا قصص الانبياء بدل الحواديت يعنى اتعودت انه موسم عبادة ولو انى مبقتش متاكدة هو موسم عبادة ولا موسم مسلسلات بس ياللة بكرة ينقرضوا زى الفوازير
ودة خلانى اخد بالى ان الناس بقت ما تفتكرش ربنا غير وقت الزنقة دة ان افتكروا اصلا وما افتكروش اسماعيل بية وعبد العال باشا الى هيحلولهم كل ماشاكلهم
ولو افتكروا غالبا بيكون بالصدفة
وكنت بفرح اوى لما رمضان يجى عشان الى الدنيا وخداة مالوش حجة فى رمضان وربنا قال
(كل عمل ابن ادم لة الا الصيام فهو لى )
وكنت بشوف ناس كتير مايصلوش غير فى رمضان وادعيلهم ربنا يهديهم
وكان دمى يتحرق اوى من الى يصوم وهو مبيصليش طب انت صايم لية بقى عشان ربنا ولا مكسوف من الناس ولا بتصوم عشان المحلات نصها قفل ومش لاقى مكان تاكل فية فتعملها بجّميلة
وكنت ارجع واقول مش مشكلة اهو الصيام فرض وفرض يجر فرض يمكن يصلوا السنة الجاية
بس السنة دى بقى اية رمضان سنة ولا كل سنة
الناس تقريبا مش واخدين بالهم اننا فى رمضان نسيوا باين ولا اية
سيبوكوا من الخيم الرمضانية الى شغالة من بعد المغرب بدل ما الناس تصلى التراويح
سيبوكوا من لبس البنات الى نصهم اتهبل والى محترمة فيهم ولبسها حشم شوية تلاقيها ماشية وفى ايدها واحد
وسيبوكوا من المسلسالات الى متعتقش الواحد غير تانى يوم و برامج الطبخ الى شغالة من الفجر
زى ما يكون رمضان دة مش شهر صيام دة شهر فجع
بس سيبوكوا من دة كلة غالبا نص الحاجات دى بتحصل كل سنة
انما الجديد بقى الى شفتوا السنة دى بس. التطور الطبيعى لرمضان
من كام يوم كدة كنت راجعة من الجامعة فى عز الحر وعطشانة وعمالة استغفر ربنا فى سرى واقول يارب اجعلة فى ميزان حسناتى
ولقيت اتنين حلوين جايبين كنتاكى وفارشين فى الارض وقاعدين ياكلوا عالرصيف وياريتهم بنات كنا قلنا مجانين ناقصات عقل ودين وظروفهم جبراهم وبجحين
لا دول ولدين وقاعد ادامهم بنتين وقاعدين يكلوا طيب فرضا ان البنات فطارهم بعذر الولاد لية بقى يعنى مشاركة وجدانية ولا حلاوة روح ولا دناوة ولا اية
واللة انا ساعتها تنحت وماكنتش عارفة اروح اكلمهم ولا انصحهم ولا اشتمهم ولا اهذئهم واقلهم اتقوا اللة ولا اية بالظبط
فى جميع الاحوال هيقولوا عليا مجنونة فاكتفيت بالنظر ليهم بقرف وتقزز واديتهم كام بصة من الى قلبكوا يحبهم
ولكنى اشك ان حاجة زى دى تاثر معاهم
وروحت وانا دمى محروق وعمالة افكر هى الناس دى معندهاش دم ولا احساس دة لولا ربنا ماكنوش لقيوا الاكل الى بيطفحوة دة
مش عارفين يمسكوا بطنهم كام ساعة يشكروا فيها ربنا
واللة انا ما بوعظ ولا نيلة بس هى فعلا حاجة تغيظ
انا اصلا مش متشددة ولا التدين معايا مقطع بعضة انا عادية جدا ولبسى وشكلى عادى برضة بس كل الحكاية انى بحب ربنا والى يحب حد ما يزعلوش
وبعدين دة ربنا : (الذى هو يطعمنى ويسقين واذا مرضت فهو يشفين والذى يميتنى ثم يحين)
هو انا الى هقولوكوا يعنى انتوا مش فاهمين
لما روحت بقى وقعدت افكر وانتوا عارفين الواحد لما بيفكر ودمة محروق بتلاقى كل حاجة جت فى دماغة ورا بعض زى الفلاشات كدة كأنك فى فيلم اكشن
لقيت ان الغلط مش من دول بس الغلط مننا كلنا
كل واحد يغلط غلطة صغيرة من تحت لتحت من غير ما يحس لحد ما فجاة تحصل كارثة كبيرة ومحدش واخد بالة
كلنا مقصرين فى حق ربنا
اى حد بيسمع اللة اكبر اللة اكبر ومايقومش يصلى كانة بيقول لربنا لا النوم اكبر او الاكل اكبر او التلفزيزن والطبخ اكبر
اتصدمت لما لقيت احنا قد اية فى غفلة ومش حاسيين
انا بقول الكلام دة لنفسى قبل ما اقولة لاى حد
يا جماعة مافيش امة فى تاريخ الامم جت على حق ربنا الا وربنا عاقبها عقاب شديد
(وكم من امة ظالمة اهلكناها)
لو انتوا ناسيين حق ربنا طب خافوا على نفسكوا
ولا عايزين نبقى زى قوم نوح الى ربنا اغرقهم الا قومة المؤمنين
ولاقوم عاد الى ربنا عاقبهم بريح صرصر عاتية استمرت سبع ليال وثمانية
ولا قوم ثمود الى ربنا عاقبهم بالصرخة الى قطعت قلوبهم ووجوههم من الرعب بعد ما عصوا نبى اللة صالح وقتلوا ناقتة
ولا قوم مدين واصحاب الايكة الى اخلوا فى الميزان فعاقبهم ربهم بالحر الشديد القاتل لمدة سبع ايام وفى اليوم الثامن بعت عليهم الزلازل والصواعق الملتهبة
ولا قوم فرعون الى ربنا بعت ليهم جميع انواع العذاب ولما عصوا اغرقهم فى اليم
ولا قوم موسى الى حكم عليهم ربهم ان يتوهوا فى الارض لاربعين سنة
(فانها محرمة عليهم لاربعين سنة يتيهون فالارض فلا تياس على القوم الفاسقين)
ولقيت قصص الانبياء عمالة تيجى فى دماغى واحدة ورا واحدة لحد ما اترعبت
طيب هنفضل فى غفلة لحد ما ننسى ربنا الى ادانا كل النعم الى احنا فيها دى
لحد ما يغضب علينا ونبقى امة من الامم دى وربنا يخسف بينا الارض
اهو دة بقى الهاجس الى مسيطر عليا اليومين دول بجد
اصل لو بصينا حولينا هنلاقى فعلا الفساد بقى فى كل مكان الناس افترت على ربنا اوى وفى 60 حاجة حرام بتحصل عادى كل يوم وبقت من الروتينيات اليومية ومحدش واخد بالة
(ظهر الفساد فى البر والبحر بما كسبت ايدى الناس ليذيقهم بعض الذى عملوا لعلهم يرجعون)
يا جماعة لو كل واحد بدا بنفسة كل حاجة هتبقى تمام مش مطلوب انك تلبسى نقاب ولا انك تربى دقنك كل المطلوب انك تصلى وفرض هجيب الى بعدة
بلاش تشيل نفسك فوق طاقتها بلاش تشيلها ذنوب هى مش ناقصة
خايفة... واخوف ما اخاف ان ربنا يغضب علينا غضب جماعى من كتر الاستهتار بفروضة
اخاف نظلم ربنا ونظلم نفسنا وربنا عدل وحكم ومبيظلمش حد
اللة ام اعنا على ذكرك وشكرك وحسن عبادتك يا عفو يا كريم
اللة ام اغفر لنا وارحمنا فانت ارحم الراحمين
اللة ام نستغفرك ونتوب اليك فتب علينا وانت خير التوابين
اللة ام اهدى بالنتا واصلح حالنا واجعل امتنا من خير الامم يا رب العالمين