انا جيييييييييييييت

طبعا اكيد وحشتوكوا وكولوكوا مش قادريين على بعدى (على اساس ان حد عبرنى اصلا) يلا حصل خير

عارفة ان فى ناس كتير زعلانين منى عشان بقالى كتير بعيد عن التدوين ودول طبعا الى

بعتولى ايميلات وكلمونى والباقى الى مش معبرنى................. مش مشكلة

وحشتونى برضة بس واللة كانت ظروف خارجة عن ارادتى الكمبوتر بتاعى كان بيصارع

فى الانفاس الاخيرة وكان لازم مراسم الجنازة والدفت والذى منة

وعشان تصدقونى جبتلكوا صورة وهو على فراش الموت

دى صورى الكى بورد بعد ما طلع عينها ونص حروفها بتضرب حروف تانية تماما ولو

ركزتوا هتعرفوا سبب المشكلة بس انا بعبقريتى الفزة حليتها

وادى الحل عشان تعرفوا انى عبقرية وليا فى كل حاجة ومفيش حاجة تخفى عليا

وبيقولوا الشاطرة تغزل برجل خروف

بمناسبة الخرفان كل سنة وانتوا طيبين

طبعا واضح من منظر الكيسة وحجمها ان مهاراتها فوق الطبيعى واللة هى زمان كان

شكلها الطف من كدة بكتير وكان لونها موف وجميلة بس مش عارفة اية الى حصل

عوامل التعرية بقى اكيد كلوكوا مريتوا بيها

ودى زى ما كلنا شايفين احشاء الكيسة بس طبعا انا مش فاتحاها عشان اوريكوا روعتها

هى من كتر التصليح زهقنا فسبناها مفتوحة واحب اوضح اكتر ان مفيش اى حاجة جوة

اسمها مسامير كلة متعلق فى الهوا بالقدرة

وطبعا من ضمن الحاجات الى متعلقة فى الهوا الهارد زى ما كلنا شايفين حبيت اوضح

بس عشان الى مخدش بالو من الصور الى فاتت

كان نفسى واللة اصورهولكوا فيديو واوريكوا الهارد وهو بيلعب بالية بس يلا محصلش

نصيت الكمبيوتر الجى وعليكوا خير

احب اطلب من الجميع فيتو ثانية حداد على الفقيد الموف بتاعى واحب ابلغ الجميع ان

باب التبرعات مفتوح لذوى القلوب الرقيقة الى عايز يتبرع باى حاجة اى حاجة انشاللة

ربع جنية يتفضل

ولو عايزين تجمعوا من بعض كدة بينكوا وبين بعض وتجيبولى لابتوب انا معنديش مانع

:]:]:]

جواز صالونات

النهاردة انا وجوهرى اخويا فى التدوين :] قررنا نعمل حركة جامدة جدا انا هتكلم فى حوار وهو يرد عليا فية من وجهة نظرة والعكس صحيح
انا هقول وجة نظرى الحريمى وهو هيقول وجة نظرة الرجالى

والنهاردة عايزة اتكلم فى حوار جواز الصالونات يعنى الجواز التقليدى لان الاراء مختلفة فية كتيير وانا مش متفقة مع كل الاراء
انا شايفة ان جواز الصالونات دة كان ناجح فى فترة من الفترات

وهى فترة سى السيد وامينة وعصر الحرمليك لان الست كانت ممنوعة من الخروج فى اى نشاط اجتماعى يكون فية احتكاك بالجنس الاخر يعنى مكانوش بيشوفوا رجالة ولا الرجالة كان بيورد عليهم حريم عشان كدة كانت الطريقة الوحيدة هى جواز الصالونات

وكان حجر الاساس فية الخاطبة الى تجيب صور بنات الجيران وتروح بيت كل واحد على وش جواز او اهلة فى رحلة بحث عن عروسة وتفرج امة على الصور او على كتالوج البنات وهى تختارلة واحدة

والطريقة دى كانت مقبولة زى ماقلنا عشان دى الطريقة الوحيدة الى هيضمن بيها انة بيشترى بضاعة مش حمضانة وكانت بتنجح وبتستمر العلاقة لسبب واحد بس ان الستات ايامها كانوا بيحاربوا عشان يطلعوا يقفوا فى المشربية شوية فمكنتش واحدة فيهم عمرها هتنطق كلمة طلاق او طلقنى عشان كدة العلاقة كانت بتستمر مش عشان الطريقة دى ناجحة لا عشان مفيش امل فى الاضراب او العتراض على الحياة بعد كدة.
والدليل ان اكبر نسب طلاق هى فى جيل الستينات لان جواز الصالونات كان لسة مسيطر على الوضع بالكامل وبعد الجواز تتصدم الواحدة فى الانسان الى هى اتجوزتة او بالاحرى الى اهلها اختارهولها وبتلاقى قدامها وسيلة اعتراض مباحة زى الطلاق فبتطلق وعشان كدة اكبر نسب طلاق فى العالم هى فى الشرق الاوسط والعالم العربى ودة السبب الرئيسى فية وليس السبب الوحيد طبعا ولكن السبب الرئيسى يرجع لجواز الصالونات
وفى احصائيات مصرية بتقول ان وصلت نسب الطـــــلاق فى مصر سنة 2006 ل 70 الف حالة طلاق بمعدل حالة طلاق كل 7 دقايق
عشان يرتفع عدد المطلقات المصريات ليصل الى مليون و495 الف مطلقة طبعا مقلتش ان السبب الوحيد جواز الصلونات بس لو فية تفاهم واختيار لية اساس بين الشخصين اكيد نسب الطلاق هتكون اقل من كدة بكتير ولا اية

دة غير طبعا الاثر الرجعى على نفسية البنت والولد يعنى تخيل معايا لما بنت يجى واحد هو واهلة يتفرجوا عليها عشان يخطبوها وخليلى بالك اوى من يتفرجوا دى
كانهم بيشتروا معزة والمطلوب

انة يجى يلاقى المحل بيلمع

ومرشوش مية ورد قدام المحل

ويجى يلاقى المعزة باللون الى سيادتة عاوزة

وبيتفقوا بقى طب يا ترى دى تاكل كام كيلو برسيم فى اليوم
ولا تخيل لو جة ومعجبتوش المعزة ومشى ومرجعش تانى وتفضل المعزة قصدى البنية يا عينى قاعدة طول الليل تفكر طب يا ترى هو انا معجبتوش لية شكلى وحش ريحتى وحشة شعرى وحش سنانى وحشة
ودى طبعا مش هتكون سطحية منها انها تفكر فى الحاجات دى لان للاسف هى دى الحاجات الوحيدة الى هو شافها
ولا سمعها ولا عرف تفكيرها ولا هى عرفت تفكيرة ولا اى حاجة من الحاجات دى

وتبقى الكارثة كمان لو رجع تانى واتجوزا وبعد الجواز اكتشفوا انهم مختلفين تماما لان دة هينتهى نهاية سووودة كلنا عارفينها وهى الطلاق
وبعدين الاثر دة مش على البنت وبس لا والولد كمان لازم يروح يشترى بدلة جديدة وجزمة جديدة وشنطة جديدة وساعة جديدة ويروحلوهم جديد فى جديد كانة يوم العيد

وفى الاخر المزة تقلك لا دة عنية خضرا انا عايزة واحد عنية زرقا زى مهند ولا صوتة حلو زى تامر حسنى ولو البنت بتترفض مرة فهى بترفض كتير ولو فى حد هيتاثر فالولد بيكون اكتر لانة بيترفض 100 مرة قبل ما يلاقى بنت الحلال طب ولية التهزيق دة
جواز الصلونات اتعمل للى مبيشفوش حريم واحنا فى الزمن دة الحريم مرميين يمين وشمال
مشفتش واحدة معاك فى الشغل واحدة زميلتك فى الجامعة واحدة جارتكوا جارت جارتكوا اكيد لو دورت هتلاقى وساعتها هتكون انت الى لاقيت الى انت عايزة وانت الى اخترت وانت الى اقتنعت ومفيش مفاجات لان انت عارف انت رايح تخطب ميين مش البواب هو الى منقيلك عروسة
وعموما دة رايى وربنا يوفق الجميع
وانتوا رايوكوا اية

بلدنا لابسة كت بكرة تقلع ملط

ياشعبي حبيبي ياروحي يابيبي ياحاطك في جيبي يابن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله ده حال

أحبك محشش مفرفش مطنش ودايخ مدروخ وآخر انسطال

أحبك مكبر دماغك مخدر ممشي أمورك كده باتكال

وأحب اللي ينصب وأحب اللي يكدب وأحب اللي ينهب ويسرق تلال

وأحب اللي شايف وعارف وخايف وبالع لسانه وكاتم ماقال

وأحب اللي قافل عيونه المغفل وأحب البهايم وأحب البغال

وأحب اللي راضي وأحب اللي فاضي وأحب اللي عايز يربي العيال

وأحب اللي يائس وأحب اللي بائس وأحب اللي محبط وشايف محال

وأحبك تسافر وتبعد تهاجر وتبعت فلوسك دولار أ و ريال

وأحبك تطبل تهلل تهبل عشان مطش كوره وفيلم ومقال

وأحبك تأيد تعضض تمجد توافق تنافق وتلحس نعال

تحضر نشادر تجمع كوادر تلمع تقمع تظبط مجال

لكن لو تفكر تخطط تقرر تشغلي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها حجيبك لايمكن أسيبك وراح تبقى عبره وتصبح مثال

حبهدل جنابك وأذل اللي جابك وحيكون عذابك ده فوق الاحتمال

وأمرمط سعادتك وأهزأ سيادتك وأخلي كرامتك في حالة هزال

وتلبس قضيه وتصبح رزيه وباقي حياتك تعيش في انعزال

حتقبل ححبك حترفض حلبك حتطلع حتنزل حجبلك جمااال

تحديث هااام

الكلام دة مش بتاع احمد فؤاد نجم زى ما كنت فاكرة

الكلام دة بتاع واحد اسمة احمد جمال الدين خاطر(ابن عمى بالمناسبة) واتنشرت اول مرة فى جريدة القوات المسلحة ومن هناك انتشرت على الفيس بوك وعجبتنى ونشرتها من غير معرف ان هو الى كتبها

مع انة ابن عمى بس مبنشفش بعض كتير بسس شغلة فى البحرية

انا ستوتة انا بيوتة

مساء الخير
وحشتونى موت عارفة اتاخرت عليكوا بس انا كدة دايما فى اخر شهر قبل الامتحانات بمتنع عن النت تماما
بس اعمل اية بقى وحشتونى قلت اجى ارغى معاكوا شوية
وانا بقلب فى المدونات الى زارتنى الفترة الى فاتت لقيت مدونة لزيزة جدا اسمها اجدع بنوتة
وكاتبة بوست عن الاعلانات المدهششششة الى بنشوفها اليومين دول

انا كنت فعلا ناوية اتكلم عن الحوار دة بس هى سبقتنى
فعلا الاعلانات بقت مستفزة جدا وتحس ان هما بيقلولك انت حمار بالعقل
قال ماما السوبر قال
بس انا بقى على عكس اجدع بنوتة
مستفزنيش ماما السوبر الى هتخلى الشمس تنور
ولبتون الى بشفتة منو هيحلوا مشكلة الشرق الاوسط ويقضوا على البطالة ويجوزوا الشباب
ولا بانتين ضد القشرة الى هيخلى كل المزز يشتغلو فى التلفزيون
ولا فير اند لفلى الى هيخليلك مستقبلك منور زى وشك بالظبط
على قد ما استفزنى الاعلانات المصرية الهاااااايلة اللى انتاجها لا يتعدى الجنية ونص.

تقريبا بيعملوا الاعلانات بنفس ميزانية العيش المدعم
يعنى المفروض ان انا لما الاقى واحدة طالعة تقول انا ستوتة انا بيوتة انا ست البيت وصغنطوطة اطلع اجرى واشترى مكنسة عشان ابقى ستوتة انا كمان اشمعنى هى
ولا الخافض الى بيوفر فى الغسلة 10 مرات
ياخى انشاللة عنك ما وفرت. ملعون ابو القرش الى ما يدلع صاحبة
دة منظر اعلان يرضى ربنا
دة انا كرهت الغسيل بسببة
واللة العظيم انضف اعلانات فى التلفزيون هى اعلانات موبينيل و ميلودى يتحدى الملل
نفسى الواد التخين دة يمسك بتوع الاعلانات دول يفرتكهم واحد واحد مزمزة كدة
ولا انتوا رايكوا اية

نصيحة للبنات

معلش اتاخرت عليكوا انا عارفة انى بستهبل الصراحة بس معلش بقى خليها عليكوا المرة دى

يلا نبدا

المرة دى بقى الكلام للبنات المساكين عشان ياخدوا بالهم وعشان محدش يقول عليا متهضة البنات ومتحيزة للرجالة

بصى يا بنتى منك ليها اقعدى كدة وربعى وركزى معايا

المفروض تكونى عرفتى ان كل الولاد بقوا موسوسين وعندهم هسس فى دماغهم ان كل البنات ........ .

يعنى بلاش شغل الهطل الى احنا كنا فية دة

مش كل ما يقلك يلا نخرج تقليلوا يلا عشان اول حاجة هتيجى فى دماغة انك صايعة و24 ساعة فى الشارع

وانتى يا ولداة هتكونى حابسة نفسك فى البيت عشان لما تيجى تخرجى معاة امك ترضى تنزلك

بس هو بما انة عرف 66 واحدة قبلك عمرة ما هيفكر فى كدة

واوعى عمرك يقلك تعالى اوصلك بالعربية وتروحى

ولو قلتيلوا لا هيقلك اية يا بنتى يعنى تركبى تاكس وانا موجود اية الهبل دة وانا الى بقول عليكى دماغك جامدة

وانتى طبعا زى الهطلة تكسفى لما يقولك كدة وتحاولى تسبيتيلوا انك مش متخلفة ولا حاجة وانك فعلا دماغك جامدة وهو كل الحكاية بيختبرك او عايز يمسك ايدك

ومتحاوليش تشتغلى نفسك وتفهمينى انك هتنجحى فى الاختبار لانة هيمسك ايدك هيمسك ايدك ومافيش مانع ابدا من انة يبوسك كمان

وورينى بقى يا جامدة هتقولى لا ازاى ولا هتقفشى ازاى وانتى مع واحد بتحبية وبتموتى فية وفى العربية بتاعتة وهو بيبصلك وبيضحكلك بعنية العسلى وبيبوس ايديكى

ابقـــــــــــــى قابـــــــــــــــليـــــــــنى

والشيطاااااااااااااان ثالثكمااااااااااااااا :]

وبعدين بلاش تليفونات طول اليل دى كتر السلام يقل المعرفة

انا عارفة ان الحوار دة بالذات صعب وكمان انتى بتكونى عايزة تعرفى كل تحركاتة طول اليوم بس الولاد بيزهقوا بسرعة فسيبى شوية لبعد الجواز مهو كدة كدة هيزهق

اصل لو كل ما يعوز يكلمك هيلاقيكى هيزهق وانتى عارفة الممنوع مرغوب

والموضوع دة عايز زكاء شوية يعنى زى ما بيقولوا التقل صنعة

وبلاش وحياة ابوكى القفش الى عالفاضية والمليانة دة اصل يعنى كتر الخناق مش هو دة الى هيسبت ان سيادتك محترمة

خلى زعلك عزيز.

وخلى دايما فى بينكم حوار

حتى لو طلب منك حاجة انى مش عايزة تعمليها لازم تفهمية وجهة نظرك الاول بالحوار سواء كان طلب عادى او كان بيختبرك لازم تفهمية انتى لية مش عايزة تسمعى الكلام بحوار هادى عشان دة الى هيبين شخصية كل واحد للتانى

ومش معنى ان الولاد موسوسين وان البنات الى بيستهبلوا زادوا حبتين فى السوق وناقص يتوزعوا عالبطايق يبقى احنا نمثل بقى وكل واحدة تعيش دور الانسة وتعمل محترمة بزيادة

لا كل واحد عارف نفسة هو على اية وانتى مش مسؤولة عن مشاكلة النفسية ولا مطلوب منك تثبتى لحد اى حاجة

انتى بس بتحاولى تاخدى بالك وتستوعبى وتحتوى مشاكلة دى بطريقة زكية

انما فى جميع الاحوال ولد بنت لازم كل واحد يكون على طبيعتة لانك لو قضتيها تمثيل انتى هتكونى اول واحدة بتتعسفى بعد الجواز وساعتها هتكون صدمة عمرك

وياريت لما نيجى نحب نحب بقلبنا وبعقلنا مش بقلبنا بس ولا عقلنا بس

فاقدين الامل ومرضى الشك

النهاردة هكلمكوا فى موضوع مطروح على الساحات بقوة اليومين دول

وطبعا انا عرفت الحوار دة بحكم ان انا عايشة فى مجتمع ذكورى بحت

يعنى اخواتى ولاد وعيلتى كلها ولاد وانا بلا فخر البنت الوحيدة فى وسط عيلة مكونة من 21 ولد تقريبا واغلب اصدقائى ولاد

.. متفهمونيش غلط صداقة بحكم الاجتماعيات يعنى جيران واصحاب الاهل والكلام الى انتوا عارفينوا دة وبعتبرهم كلهم اخواتى يعنى

وبصراحة الولاد اجدع من البنات بكتير واريح للدماغ ولا فلانة قالت ولا علانة عادت و انا مليش فى حوارات الحريم دى اصلا.

يعنى تقدروا تقولوا انى ليا بتاع 30 اخ واختين

وبما ان كل اخواتى لما بتقابلهم مشكلة بيجوا يحكولى صغير فيهم او كبير فلقيت ان فى مشكلة مشتركة بينهم كلهم وبعد مباحثات اكتشفت ان كل الولاد كدة بلا استثناء

المشكلة ان هما من كتر ما شافوا حاجات مبقوش يثقوا فى البنات خالص

لدرجة ان ابن عمى مرة قالى" انا مش مصدق اصلا ان عندك 21 سنة وعمرك ما اتبستى" ...!

طبعا السؤال صدمنى وحاولت اتمالك اعصابى عشان ماردش علية رد فج او غبى وكمان عشان افهم وجهة نظرة فى السؤال البجح دة.

اصل من امتى يعنى والبوس والاحضان دى حاجة عادية كدة زى ما يكون بيسالنى انتى عمرك ما كلمتى ولاد ولا عمرك وقفتى مع زمايلك فى الجامعة

يمكن جزء من صدمتى انة كان اصغر منى وانا فى سنة بصراحة مكنتش لسة اكتشفت اية البوس دة اساسا

المهم حاولت انى امتص حدة الموقف واقلبها هزار

وقلتلة "يا نهار اسود اتباس ازاى يعنى زى براد بيت وانجلينا جولى كدة "

مات من الضحك زى ما يكون انا من العصر الحجرى. وفكرنى بتيتة لما كانت بتقول على الانترنت الالترليت

قالى" يا بنتى هو انا بقلك حاجة كبيرة دى بوسة "

طبعا مسئلتش هو فية اية اكبر من كدة عشان مش عايزة اعرف مدى التطور الى احنا انجزناة

واكتفيت بانى اسالة " يعنى انت لما تيجى تتجوز هترضى تتجوز واحدة انت عارف انها باست واحد قبلك"

قالى" ياريت الاقى واحدة اتباست بس اصلا"

طبعا سيبتة وقمت لانى من الصدمة بجد ما كنتش قادرة اكمل الحوار

وبعدها بيومين قام بينى وبين اخويا الكبير حوار مشابة

(مش كبير اوى يعنى اكبر منى بسنة واحدة بس)

وحسيت فى نبرة كلامة على عكس كلام ابن عمى فاقد الامل لقيت ان دة فاقد الثقة تماما

قلتلة " مهو كدة انت لو اتجوزت واحدة وحسيت انها ممكن تكون حبت قبلك مش هتقدر تثق فيها"

قالى" مين قالك انى هتجوز اصلا...هاتيلى بنت واحدة عدلة وانا اتجوزها"

طبعا الى اثار كل الحوارات دى ان لينا صديق مقرب جدا للعائلة فرحة بعد العيد والمشكلة ان الى هو ناوى يتجوزها .......... مش مناسبة اوى يعنى

وبعد محادثات طويلة بيننا وبينة اكتشفت ان هو الاخر فاقد الامل لدرجة مخيفة وكانت اخر كلمة قالها

"ما كل البنات كدة"

لا يا جماعة

واللة العظيم مش كل البنات كدة

وللولاد الى فقدوا الامل والى فاكرين ان خلاص امة هى اخر النساء المحترمين

واللة العظيم المحترمين كتير وعلى قفا من يشيل ومش لاقين حد يعبرهم بس الى يعرف يحكم صح وللاسف السيئة بتعم والبنات الى مش كويسين بيعرفوا يوقعوكوا صح

وللولاد الى فاقدين الثقة فى البنات مش معنى ان هى مشاعرها رقيقة واحترمتك وحبتك ووثقت فيك يبقى هى مش محترمة ولا بت من اياهم مش عشان سابتك تمسك ايدها تبقى عملت وسوت وهببت قبلك.

ما قلتش ان هى كدة عمايلها صح لكن بقلك احكم بالجوهر مش بالمظهر

وانا من منبرى هذا ... أ احم.. قصدى يعنى بما انى بنت فاكيد عندى خبرة الى حد ما فى حركات الحريم

وهقلك على كام حاجة يالى فى بالى .. عارف نفسك طبعا..

البنات نوعين محترمة ومش محترمة.........!

البنت الى مش محترمة نوعين:

النوع الاول: مش محترمة وعارفة انها ش....... مش محترمة وراضية وعاجبها ومقتنعة بنفسها انها مش محترمة ومعندهاش اى مانع ان الناس تقول عليها مش محترمة

وطبعا افتكر انى مش محتاجة اقولك انك تبعد عن النوع دة خاااالص الا اذا كنت انت ابيح بقى انت حر فى نفسك

النوع التانى: تبقى مش محترمة بس من تحت لتحت

وتيجى تكلمها تقلك لا انا مبكلمش ولاد انا مبسلمش على حد فى الشارع

انا عمرى ما كلمت ولاد اصلا

بلاش ترنلى بعد الساعة 8 احسن مامى بتقفش

واوعى تكلمنى دادى جى ورايا

وطبعا انت زى الجردل تلبس فى الحيط وتقول بس هى دى محترمة ومؤدبة وبنت ناس ومامى ودادى

وهى تلاقيها اسمها سالى اساسا وابوها واقف فى الخلفية يقول بـــــــــــــــــتــــــــــــــ يا ساااااااااااااالى كل دة ........

وانت طبعا بما انك فاقد للامل فبتكون معذور اول ما تلاقى واحدة زى دى بتتشعبط فيها زى الغريق الى بيتشعبط فى قشاية

ودى مش هقلك فيها غير حاجة واحدة مشى وراها واحد صاحبك حلو حبتين وبعربية جامدة وشوف هى هتعمل اية ان مكانتش تقلبك بعدها بيومين وتعلقة مبقاش انا.

نيجى بقى للغلابة المحترمين الى متاخدين فى الرجلين فهما برضة نوعين :

النوع الاول:

الولد: بحبك

البنت :.... بتحبنى ... ازاى يعنى انت اهبل ولا اية

الولد: يحاول يقف جمبها داخل الحرم الجاااامعى

البنت :اية دة اية دة اية دة ...... انت هتهترج معايا

الولد :اية يا بنتى ما بترديش على موبايلك لية كلمتك امبارح 60 مرة

البنت :انت ازاى تكلمنى عالموبايل اصلا انت مش عارف انى فى البيت

الولد :فى النادى يسلم عليها

البنت :اية دة يعنى ان شاء اللة لما نبقى نتخطب يا بابا تبقى تمسك ايدى ال يسلم عليا ال

وتبصلة بصة ذكاء ال يعنى البت بقى جابتة كدة لا صايعة يا بة

وطبعا انت ترضى بالهم دة كلة لانك عايز واحدة محترمة وعندك وسواس ان كل البنات زى الزفت وتروح زى البرنس تطلب ايدها وبعد الجواز تلاقى الحقيقة المرة انك انت للاسف اتجوزت لوح ثلج يعنى لو كنت اتجوزت صول دورية كان اشيكلك

النوع التانى من البنات المحترمين:

تلاقيها كدة قطة عسولة كتكوتة بتحبك وبتموت فيك ولو زعلت منها فى مرة تموت نفسها عشانك وكل حاجة نعم وحاضر وطيب

تقلها بحبك تقلك وانا كمان

تيجى تمسك ايدها يادوب وشها يحمر وتدارى عشان متحسسكش انها مكسوفة

وطبعا بما انك فاقد للثقة ومريض بالشك اول متسيبك تمسك ايدها هتقول بس هو انتى منهم لا يا عم دة انا مسكت ايدها

طب المطلوب منها اية تقوم تلطشك بالقلم عشان تبقى محترمة هى مش كدة

طبعها رقيق استحالة هتعمل كدة .ولو عملت كدة تبقى مبتحبكش

وللاسف فى الغالب النوعية الهطلة دى بتكون انت اول واحد فى حياتها ولو مكنتش فبيكون قلبها دهب وانت زى العبيط بتضيعها من ايديك بالشك المريض الى عندك

ولان اغلب الولاد تفكيرهم عمرة ماكان ابعد من مظهر ولبس وشوية حركات فبتحكم عليها من برة بس من غير ما تحكم على شخصيتها

وزى ما انتوا شايفين لو بصينا للمظاهر هتلاقى انة سهل اوى النوع الاول من البنات المحترمين يتلخبط مع النوع التانى من البنات الى مش محترمين

والنوع التانى من البنات المحترمين ممكن انت تعمل فتك وتفتكرها من النوع الاول من البنات الى مش محترمين

هتسالنى وتقولى طب وانا اعرف منين

هقلك يا مسكين:

رقم واحد

لازم تتخلص من كل الكلاكيع والعقد الى عندك من فقدان الامل والشك الى انت فية

رقم تو

وانت داخل علاقة جديدة تدخل فاتح قلبك وعقلك الاتنين واحد بس ما ينفعش

رقم تلاتة بقى

نفض لحركات الحريم القارعة دى وركز وحلل البت نفسيا وسيكولوجيا

مش معنى انهى قالتلك انت اهبل اوعى كدة تبقى محترمة

ومش معنى انهى سابتك تمسك ايديها وقالتلك بحبك تبقى سافلة

ولما تختار اختار الشخصية الى تناسبك والى تحافظ عليك وعلى بيتك وعلى كرامتك وعلى رجولتك

يعنى من الاخر اول صفة تدور عليها الاخلاص

البنت المخلصة مش الى بتحبك وهى حاطة 4 استبن لو انت ما روحتش تخطبها فى غيرك يعنى . اشطة

ولو لقيت بجد البنت الى بتحبك ومخلصة ليك ومحافظة عليك يبقى انت كدة كسبت حتى لو مسكت ايديها

معلش طولت عليكوا

انا كنت كاتبة البوست دة اصلا فى 7 صفح

بس حاولت اختصر على قد ما قدرت

وللحديث بقية قريبا ان شاء اللة

سوووووووون

انت التلت وانا التلتين

أحمد كان فى يوم معاه سمكة

جه مصطفى و أخد منه السمكة بتاعته

أحمد و مصطفى قعدوا يتخنقوا و يبهدلوا فى بعض

جه يوسف قلهم لا لا لا يا جماعة فين قيم الحوار و التسامح أنا عندى فكرة : أحمد ياخد تلت السمكة
وانا تلت و مصطفى تلت و بكده كلنا هنبقى سعداء و مبسوطين

خلصت القصه

وأحمد الاهبل بقى مبسوط بتلت السمكة اللى كلها كانت بتاعته

حسبنا الله و نعم الوكيل

القصة ملطوشة بس بجد كان لازم احكيهالكم